Welcome to Urdubiography
Home >> Poets >>Abdul Qadir Junejo  

 

 

Abdul Qadir Junejo


Abdul Qadir Junejo is a son of the sand. He was born on 13th September 1945 in a small village of Thar named Janhan. Abdul Qadir Junejo is a basic writer of sindhi language. He also wrote the drama serials. Abdul Qadir Junejo received twice presidential award for best performance in 1989 and 2008. He received PTV award for best writer in 1983, 1985 and 2010. His Father named Mureed Hussain Junejo was a police officer. Abdul Qadir Junejo did matric in 1961 and received the master’s degree in Sociology. He started his practical life in 1962 at Tharparkar as a primary school teacher. Abdul Qadir Junejo selected as a deputy director publication in the institute of Sindhlogy in 1976. He received the charge of director in the institute of Sindhlogy in 1988. Abdul Qadir Junejo selected as a chairman of sindhi language authority in 2005 till 2008. His first sindhi drama serial viewed in 1970 from radio Pakistan, Hyderabad station. Abdul Qadir Junejo had wrote 22 sindhi dramas for radio and 11 Urdu and 5 sindhi dramas for TV. His first English novel is “ The Dead River ”. In this page you can see the biography of Abdul Qadir Junejo.

Abdul Qadir Junejo Biography


Abdul Qadir Junejo ka shumar sindh ke un adeebon aur danishwaron mein hota hai, jin ke qalam ki badaulat un logon ko bhi waadi e mehran ki tehzeeb o saqafat aur tamaddun o muaashrat se shinasaai naseeb hui, jo sindhi zubaan se aashna nahi. Television ko maujoda daur mein iblaagh ka taqatwar tareen media samjha jata hai aur Abdul Qadir Junejo ne apni “ Dharti Maa ” ke dukh dard, bhook piyas, rehan sehan, reet riwaaj aur khushi ghami ko baqi duniya ke sath baantne ke liye isi media ka sahara lia aur khoob lia. Yun to inho ne sindhi zubaan mein bohat kuch likha hai, lekin mulkgeer shohrat apne TV dramas se paai. PTV channel se nashar hone wali Urdu drama serial Deewarein ne to inhe awami maqboliyat ke baam urooj tak pohancha dia.


2 baar sadarti tamgha e barae husun e karkardegi 1989 aur 2008 mein aur 3 baar behtareen likhari ka PTV award ( Dewaarein 1983, Kaarwan 1985, Paani ki Dewaar 2010 ) hasil karne wale drama navees aur afsana nigaar Abdul Qadir Junejo ne 13 September 1954 ko sehra e thar ke aik chote se village Janhan mein janam lia. Wo khud batate hain ke in ke aaba o ajdaad oontniyan paalne ka kaam kiya karte the, jab ke walid Mureed Hussain Junejo police officer hua karte the.
Abdul Qadir Junejo ne 1961 mein Deploy naami qasbey se matric kia aur phir is silsile ko aage barhate gae. Zamana talib e ilmi mein he inho ne M Aslam, Naseem Hijazi aur Krishen Chandar ke novel parh dale aur Qurrat ul Ain Haider ke novel to kae kae baar parhe. Ibtedai taleem ke marahil tey karne ke bad inho ne samajiyaat mein masters ki degree hasil ki. Shayad yehi wajah hai ke samaaj aur is ke masaiyl in ki kahaniyon ka bunyadi mauzoo hote hain. Inho ne 1962 mein apni amli zindagi ka aaghaz Tharparkar mein primary school teacher ke taur par kia. 1976 mein wo jamaa sindh ke vice chancellor Sheikh Ayaaz ke eima par isi university ke zaili idarey institute of sindhalogy mein deputy director publications muqarrer hue. 1988 mein inho ne isi idarey ke director ke taur par apne auhdey ka charge sambhala, jab ke 2005 mein inhe sindhi language authority ka chairman bana diya gaya, jahan inho ne 2008 tak khidmaat anjaam di.


Abdul Qadir Junejo ka pehla sindhi drama 1970 ki dihaai mein Talaash ke unwaan se radio Pakistan, Hyderabad station se nashar hua tha. Drama nigari Abdul Qadir Junejo ke liye junoon ya passion ka darja rakhti hai. Wo radio ke liye ab tak 22 sindhi dramas likh chuke hain. Jab ke TV ke liye Urdu language ki 11, aur sindhi ke 5 drama serials tehreer kiye hain. Inho ne Deewarein, Choti si Duniya, Kaarwan, Seerhiyan, Paani ki Deewar, Thori Khushi Thora Gham aur Rani ki Kahani samait dukh such bhare kae shahkaar dramas takhleeq kiye hain. Is le ilawa sindhi dramas mein 15 kutub bhi tehreer kar chuke hain. Inho ne jinho ne isnaaf sukhan ka tajurba kia, in mein afsana, shakhsi khakey, ilmi mazameen aur tarajum waghera qabil e zikar hain. In ke qalam ne jahan Urdu aur Sindhi ke qaraiyn ko apne sehar mein mubtila kia, wahan inho ne angrezi zubaan par bhi tabaa aazmaai ki hai. In ka pehla English novel “ The Dead River ” shaey ho kar qaraiyn aur naqadon se daad wasool kar chuka hai aur in dino wo aik aur English novel likhne mein mashghool hain. Abdul Qadir Junejo ki famous drama serial “ Choti si Duniya ” par free University of Berlin Germany ki Doctor Helen Basu ne aik tehqeeqi maqalah ( Thesis ) bhi tehreer kia hai.


Abdul Qadir Junejo ka mizaaj larakpan se he “ Adeebana ” tha, inho ne unfawaan Shabaab he mein apna rishta kaghaz aur qalam ke sath jorh lia. Kitne he maah o saal guzar gae, lekin Qalam ki Mazdoori aaj tak jaari hai. Qalam in ki kamzori bhi hai aur taqat bhi. Kamzori is liye ke is ke baghair wo zinda nahi reh sakte aur taqat yun ke aaj wo jis maqaam par hain, wahan tak inhe lane ka sehra bhi isi qalam ke sir hai. Kutub beeni aur mutalla in ke pasandeeda tareen mashaghil hain.


Abdul Qadir Junejo ke baqaul inho ne kahani biyaan karne ka funn Thar ke charwahon aur jail ki saza bhugatne wale qaidiyon se seekha hai. In ke walid chunkey police officer the. Jo mukhtalif maqamaat par taainaat rahe, chunache qaid khano, qaidiyon, beqasoor mulzimaan aur jurm u gunah ki daastano se Abdul Qadir Junejo ka qareebi waasta raha aur yeh waqeyaat larakpan se he in ke zehan par naqsh ho gae the. Jinhe baad mein inho ne apni kahaniyon mein nihayat maharat se piroya. Inho ne hamesha charwahon, kisaano aur mazdoron se dosti gaanthe rakhi aur aaj tak nibha rahe hain.


Abdul Qadir Junejo ki kahaniyon ki aik khaas baat yeh hai ke wo chote chote jumlon mein barhi barhi batein keh jate hain. In ke makalmon aur jumlon mein aik jahan maayne poshida hota hai, nazreen aur qaraiyn apni apni sojh bojh ke mutabiq he in maayne tak pohanch paate hain. Waise aam logon ke liye to satahi maeyne he kafi hote hain. Junejo sahib ka style yeh hai ke wo sirf ishara kar ke baqi muaamla apne qaari ki feham o farasat par chor dete hain. Is ka hath pakar kar matloba maayne aur mafaheem tak zabardasti khench kar le jane ki koshish hargiz nahi karte.


Abdul Qadir Junejo apne ghair riwayati rujhanaat ke baiys na to adbi halqon mein ziyada uthte bethte hain. Na he showbiz ke sitaron se ziyada mail jol rakhte hain. Inho ne qudrat se darweshana mizaaj paya hai. Yehi wajah hai ke jaah o mansab walon ki maaeyat ke bajae farsh nasheeno ke sohbat mein ziyada khush rehte hain. Wo dictation lene ke qaiyl nahi, shayad yehi wajah hai kea b inho ne TV drama likhne se doori ikhteyar kar li hai aur aaj kal khud ko “ Sabiq Drama Nigaar ” qaraar deta hain. Darasal dosron ke batae hue mauzoaat par qalam uthana inhe pasand nahi. Jab in se kaha jata hai ke falaan tabqey ke huqooq ke hawale se kuch likh do to wo forun he apna Haq inkaar istemal karte hue maazrat kar lete hain. Likhne likhane ke muaamle mein intehai ziddi waqey hue hain. Farmaiysh par likhne ko apni tauheen samajhte hain. Halan ke zindagi ke deegar muaamlaat mein khoob lachak dikhate hain. Mehfil mein daanishwari bigharne ke bajae dosorn ki batein sunne ko tarjeeh dete hain. Agar in ke mou pe tareef kar di jae to aise sharmate hain ke jaise koi nae naweli dulhan haya ke marey gulnaar hui jati hai. Mausoof classical mauseeqi se bohat shaghaf rakhte hain. Batate hain ke haal he mein inho ne smart phone is liye kharida ke classical mauseeqi download kar ke sunte phiren. Khud ko Ustaad Shujaat Hussain Khan, Kishwari Amoonkar, Pandit Bheem Seen Joshi, Umrao Khan aur Pandit Tarwan Bhatacharia ka aashiq batate hain, koi in mein se kisi ka sirf naam bhi le len to in ki aankhein chamak uthti hain.


Abdul Qadir Junejo ka khameer sehra e Thar ki rait se utha hai aur in ki tehreeron mein regzaron ki piyaasm qehat o iflaas, hiddat o shiddat, pyar o tehwaar ke tamam rang jhalakte hain. In ke pehla sindhi novel “ Swades Musafir Mohanjorey ” ( Musafir Yeh Dess Hamara Hai ) ha, jis mein sehra e Thar ki zindagi, zeerein sindh ki saqafti bashariyat aur muaasharti tareekh ki nihayat khobsurat andaaz mein akassi ki gai hai. In ke English novel “ The dead River ” bhi sehra e Thar ke tanazir mein likha gaya hai, jise baja taur par Thar aur sindh ki saqafat ka encyclopedia qarar dia ja sakta hai. Sehra ki rasmein, zabanein, mausam, yaariyan aur chooriyan, saanp aur mast oont, dosheezain aur jogi… gharz registaan ke tamam rang is mein jhalakte dikhai dete hain.


Abdul Qadir Junejo ke liye kaha ja sakta hai ke wo sehra ke qabil fakhar bete hain. Aise sehra nasheen ke jin ke liye shaeyr ne kaha tha


Fitrat ke Maqasid ki karta hai Nigehbani,,,
Ya Banda e Sehraai ya Mard Kohistani…

 

More Links

Zulfiqar Ali Butto Benazir Bhutto Ahmed Nadeem Qasmi
  Shahbaz Sharif Parveen Shakir

 

 

 

 

 

 

@Copy right 2012-2014 www.urdubiography.com