Welcome to Urdubiography
Home >> Poets >>Agha Hashar Kashmiri  

 

 

Agha Hashar Kashmiri

Agha Hashar Kashmiri was the legendary playwright and Urdu Poet. He was born on 3, April 1879 in Banaras. Agha hasher kashmiri was very famous in Urdu and Hindi dramas. He was also a great and marvelous poet. His fans said that, agha hasher kashmiri is a Shakespeare of Hindustan. His great poem was “ Shukriya Europe ” and “ Mauj e Zamzam ”. In the end of this topic we gave you a very beautiful poetry of Agha Hashar kashmiri. In this page you can see the biography of Agha Hashar kashmiri.

Agha Hashar Kashmiri Biography In Urdu

20 century ki pehli tehai mein, yani aaj se koi 100 saal pehle, Agha Hashar kashmiri ka naam pore barre sagheer Pak o Hind mein goonjta tha. Natiq film aam nahi hui thi, jo kuch tha theater he tha. Drama companies tafreeh ki duniya par chaai hui thin. Bombay aur Calcutta in ke barhe marakiz the. Yeh shehar shehar phirte aur dramey dikha kar paise aur daad samait’te. Drama nawesi ke maidaan mein Agha Hashar kashmiri ke jhande garhe hue the. In ke Urdu aur Hindi dramey maqbool aam the. Shaiyr bhi bala ke the aur nasarnigar bhi apni tarz ke… baqaul Maulana Zafar Ali Khan “ Dramey ki is nakara zindagi ko jo gul o bulbul ki tashbihaat, husun o ishq ke waqeaat, khail kood aur tafreeh tabaa ke mashagil se veeran bani thi, hashar ne is ko buland paya mazameen, nasihat khaiz aur ibrat angez waqeaat aur ikhlaqi tarz e tehreer se rang kar is tarah aabad kar diya ke baagh e rizwan ki dilchaspiyon ko is ki lutafaton par muskurana parha. ”


Agha Hashar ko in ke maddah Hindustan ka Shakespeare qarar dete hain. Bohat se Shakespeare se bhi barha dete hain. Aise bhi maujood the. Jo in par Shakespeare ki “ Khosha Cheeni ” ka ilzaam lagate the, lekin is ka aiteraf sab he ko tha ke apne maidaan ke wo rustam hain. Is ke saamne kisi ka chiragh nahi chalne paya.


Apne ibtedai halaat ke barey mein in ka apna beyaan hai. “ Buzurgon ka watam Kashmir hai. In par kuch aesi uftad parhi ke Amritsar aae, wahan se walid marhoom shaalon ki tijarat ke silsile mein Banaras pohanche aur wahin dairey daal diye, har chand inho ne meri taleem mein saaii ki lekin jee na laga. Faarsi ki chand kitabein parh kar chor di. Wo purani wuzaa ke aadmi the aur mujhe mulla e maktabi banana chahte the, lekin mujhe mullaiyat se nafrat thi. Abhi masein bhi nahi bheegi thin ke Banaras se uth kar Bombay pohancha. Wahan ke paarsiyon ne theater ka aisa tilisam baandh rakha tha ke adnaa o aala sab is par ghash the. Main ne bhi drama likhne ko zariya ma’aash banaya aur aik, do drama likh kar Shakespeare par hath saaf kiya. Agarcha in dino Bombay mein barhe barhe Insha parwaaz aur poet maujood the, lekin Khuda ki qudrat ke thore dino mein sab gard ho gae. ”


Agha ka naam Maa baap ne Mohammad Shah rakha tha. Hashar kashmiri ka qalmi naam khud ikhteyar kiya aur hashar barpa kar diya. 1 September 1876 ko Banaras mein paida hue aur 28 April 1935 ko Lahore mein aakhri saans li. Miani sahib ke qabrustan mein mitti ki chadar oarh kar lete aura b tak sou rahe hain… baqaida to kam he parhe lekin mutalle ne inhe barha aalim bana diya. Mazhab, tareekh, adab, tibb, shairi aur philosophy…kisi bhi mauzoo par be takaan guftugo karte aur sunne walon ki mabhoot kar dete. Maulana Zafar Ali Khan ki tarah fil badiha shair kehte aur sungilaakh zaminon mein phool khila dete. Maulana Chiragh Hassan Hasrat kehte hain ke “ Maulana ke bad is maidaan mein in ( Agha Hashar ) ka koi saani na tha. ”


Agha Hashar bala ke badanosh the lekin marne se 3 saal pehle tauba kar li, tarah tarah ke awariz ka shikar hue, in ke kae doston ne is ka sabab badanoshi ka yaksar tark qarar diya aur inhe aik had tak yeh shughal jaari rakhne ka mashwara dete rahe, lekin wo na maney, in ka israar tha ke in ki zehni salahiyatein pehle se ziyada ho gai hain.


Agha ne bila mubalgha lakhon kamae aur barhi aasodgi ki zindagi basar ki, lekin zaroratmand izzah aur aqrabaa ka hissa apni kamai mein baqaida rakha. Qareebi rishtedaron ko to hazaron kya lakhon de dale, door ke rishtedaron ko bhi yaad rakha, bewah aurton aur yateem bachon ke baqaida wazifey muqarrar the, apni waldah ki aesi khidmat ki ke apne halqa e tarruf mein aik misaal ban gae. Apni zaat se in ko is lihaaz se to barhi mohabbat thi ke apni tareef aap karne mein kami na karte. Khud kehte hain, “ wo zamana bhi ajeeb tha, main drama bhi likhte the, sharab bhi peete the, na kabhi namaz parhi aur na roza rakha, lekin deeni hararat se dil gudaaz tha. Aarya aur eesaai Islam par aiteraz karte the aur main aur Abu Al Kalaam inhe jawab dete the, mukhtalif mazahib ki kitabein parhe, aaryon aur eesaiyon ke radd mein risaley likhe, manazirey kiye aur jis dangal mein utra, fatah paai. ”


Maulana Zafar Ali Khan ne in ke barey mein qalam uthaya to aiteraf ka darya baha diya, “ Khosha naseeb sir zameen Banaras ke tere zarodin ( Kookh ) se aik aesi bakamaal hasti wajood mein aai ke jis ne duniya e ilm o adab mein talatum paida kar diya. Zamane ki mukhalif hawaaen, mukaddar fizaen, duniya ke gharzmand aur hasidana aehbaab, hashar ki duniya e shohrat o tarraqi ko pamaal o barbaa karne ke liye har chahar taraf mandla rahe the magar hashar ki takhilaat ki jiddat taraziyan hashar ko itna ooncha le gai, wahan le gai, jahan Hindustan ka koi poet, koi drama navees door maazi o haal na pohancha tha aur na pohancha hai, aainda ka haal Khuda behtar janta hai. Hashar ne shairi ke jis maidan mein aboor kiya, drama navesi ki jo manazil tey ki, wo is daur ke kisi musannif, kisi shair, kisi drama navees se tey na ho saken… hashar sahib apne rang o tarz ke wahid likhne wale the. ”


Agha ko nazam aur nasar dono par qudrat thi. Dil aik sache musalman ka tha. Millat Islamia ke aehwaal par kurhte aur nala e dil ko nazam karte the. Anjuman himayat Islam, Lahore ke salana jalson mein nazmein parhen to dhoom mach gai. In ke poetry bache bache ko azbar ho gae. “ Shukriya Europe ” aur “ Mauj e Zamzam ” in ki shahkar nazmein thin, jinho ne musalmano ko rulaya, tarhpaya aur jhinjhora. In ki poetry mahu ho chuki lekin “ Shukriya Europe ” mein manajaat ka tukra aaj bhi zabaan zad khaas o aam hai. Milad ki mehfilon aur masajid ke ijtemaat mein bachasham numm parha jata hai lekin kam he parhne walon ko maloom ho ga ke yeh Agha Hashar ka karishma hai aur yeh ke Agha Hashar kaun the ??? koi ise Iqbal ka karishma qarar deta hai to koi hali ka kamala samajhta hai


Aah jati hai falak par reham laane ke liye,

Baadlon hut jao de do raah jane ke liye,

Ae duaa haan arz kar arsh e ilahi thaam ke,

Ae Khuda, ab pher de rukh gardish ayyam ke,

Sulah thi kal jin se ab wo barsar e paikaar hain,

Waqt aur taqdeer dono darr pe aazaar hain,

Dhoondte hain ab madawa sozish e gham ke liye,

Kar rahe hain zakham e dil, faryaad marham ke liye,

Reham kar na apne aaiyn e karam ko bhool jaa,

Hum tujhe bholey hain lekin tu na hum ko bhool jaa,

Khalq ke roandey hue, duniya ke thukrae hue,

Aae hain ab tere darr pe haath phelae hue,

Khuwaar hain, badkaar hain, doobey hue zillat mein hain,

Kuch bhi hain lekin tere mehboob ki ummat mein hain,

Haq paraston ki agar ki tu ne diljoi nahi,

Tanaa denge butt ke Muslim ka Khuda koi nahi.


Links

Zulfiqar Ali Butto Benazir Bhutto Ahmed Nadeem Qasmi
Habib Jalib Shahbaz Sharif Parveen Shakir

 

 

 

 

 

@Copy right 2012-2014 www.urdubiography.com